vendredi 4 juillet 2008

سيمو جاه الإلهام


!!وواحد السلام عليكم ياخوتي وخوتاتي
إوا, كي دايرين, كي دايرات, و كي بقيتو معا دّنيا?...غيبة واش من غيبة هادي! والله إلاَ توحشتكم بزاف المهم ياسيادي سمحوليا بزاف على هاد الغبرة,ولكن راكم عارفين,مشاكيل الإمبراطورية وخلاص(السينياتورات,التدشينات,الولائم الرسمية,الكلمات الشرفية...). بالصراحة, واخا غبت, مانقطعت على الكتابة من أجل المدونة البوفبوفية لدرجة اني كتبت كتر من ربعة ديال لبوستات ,واحد فيهوم فيه كتر من 10كيلوميتر(اه...لحب و مايدير) كان هو الي غايتنشر ولكن شي مستجدات ديبلوماسية خلاتني نديرو بين قوسين

في انتظار أن تستقر الأمور ديبلوماسيا,غانعاود ليكوم واحدة من هادوك لقصص دياولي مع صحايبي العزيز سيمو...ماتقولو ليا ماعقلتو
عليه!على سيمو ولد العطار الي تايسحاب راسو مريكاني,و الي قسم معايا جائزة مسابقة سمبلي مروكان

المهم ياسيادي, كنت تانتسارى فالدريبة,و كيفما يقولو خوتنا الفرنسيس,"بارازار" بان ليا سيمو تيتمشى وراسو محدور,على غير عادتو.جريت عندو وعيطت عليه
!بوف:سيمو...سيمو
ماسمع والو! تقول ولاّ صمك, عاودت عيط عليه بالجهد!!بوف:وا سيمو...وااااا سيمــــوووووطلّع سيمو راسو,و بدا يشوف موراه ساهي و مدهوش...شي تلاتة تواني من بعد عاد قشعني
سيمو:شكون?! بوف! اهلان اهلان واحد الراجل,وا كي داير?شحال هادي ما شفناك أصاحبي!والله إلا توحشناك...على مايظهر,باقي حي, وفصحة مزيانة
بوف:لا لا,مابقيتش حي,زادوني فالرتبة والشرف ورقاوني, دروك وليت دوار
سيمو:هه هه هه, راك ماتتبدلش,ديما حامض مع راسك
"بوف:إوا راه قلت ليك شحال من مرة أنا من دوك الناس الي ديما تيدعيو و تايقولو:" اللهم لا تقشرنا ولا تبدل صباغتنا
سيمو: والله إلا صدقتي يا خاي
بوف:أجي بعدا...فين كنتي غابر? عرفتي شحال من مرة دزت عندك للدار?!و فكل مرة تنسول عليك,تتقول ليا موك الحاجة راك فالجبل.ومنين سولتها بطريقة مؤدبة, اشنو تاتدير هناك:"ماداتا غين إسكار إويم أن?" قالت ليا:مشا يتأمل ويتدبر باش يفهم الحياة ومعناها.واش بالصح هاد الشي
سيمو: آه,بالصح.وزعما ماتتيقش بالوالدة ولابوف:لا لا,حاشا غير قلت "أوكان" راه يمكن تلفات ولا غلطات
سيمو:ما تلفات ما والو,راها إوصلات المعلومة كما يجب...عرفتفي خاي بوف,كنت شي يامات طالع ليا الغار و الزبل للراس من هاد الدنيا,وقلت زعما ننعزل شويا,ونمشي نتأمل و نتدبر...عل و عسى
بوف:أوّاه,تتأمل وتتدبر!!...واش كاع درتي فهاد المدة بالسلامة
سيمو:عشت تجربة إلهام
بوف:أشنو,إلهام?! وزعما خلّها باها الحاج دّا حماد تمشي معاك
سيمو: لا يا بوراس,كان تيجيني الإلهام,بحال هداك الي تايجي الشعراء والمتصوفة و
بوف: و هاد الإلهام, تايجيك من جهت باك ولا من جهت موك
سيمو:نقص أخويا من الحموضية,راك قهرتينا...عرفتي نتا, الي بغا يهدر معاك خاصو ديما تكون معاه باكية "ماعلوكس" ف الجيب
بوف:إوا راك عارف أش كاين, هاد شي ما عطا الله و السوق!غير صبر معانا و صافي...قولي, من الي كان تايجيك الإلهام,شنو كان تايجيب ليك معاه
...سيمو:داك شي عظيم أخاي بوف,تايجيب لي إحساس واعر,تصور معايا
ماقدرتش نخليه يكمل لجملة ديالو, وماخليتوش يكمل لجملة ديالتو,لأن "الواجب الحموضي" كان تاينادني

بوف:مايمكنش نتصور معاك,لاحقاش نسيت المصورة فالدار...إلا بغيتي نقدر نتفوطوكوبا معاك,راه جامع مول لفوطوكوبي مزال محلول أنا غير درت هاد التدخل الحامض ,و الطبيعي من وجهة نظري,حسيت بالسيمو تنرفا,ولكن ما سب ما عاير كيف ما كانت عادتو!...أنا جاني العجب وبديت غير حال فمي...أواه!أشنو جرى?ياك ما بالصح جاه الإلهام وبدلو?كمل سيمو كلامو ودار بحال إلا مادار والو...الواعر كاع,تبسم هو يقول :"با مال", خاي بوف, هادي ما بيهاش ,وزاد كمل كلامو وقال
سيمو:قلت ليك أخاي بوف لعزيز,تخيل معايا الجبال العاليا مقابلة للبحر وغابات الاركان,والشمس تتغرب مورا البحر... والصمت المطلق...عرفتي تتحس بشي عظيمة تتحرك فالداخل ديالك و...د
أنا صافي غير قال هاد شي وتصدمت.صافي عرفت اش بيه!ماخليتوش يكمل كلامو
بوف:صافي يامسخوط لوالدين,وليتي مسكون,سكنوك هادوك"بسم الله رحمان رحيمين" .والله حتى بقتي فيا
أنا الي ماقدرت نفهمو,هو علاش نتا بالدات?على مايبان ليا حتى هوما مساكين عندهوم ازمة حادة فالسكن,لدرجة انهم مالقاو مايسكواتيو غير نتا.إوا الله يكون فعونهوم,راه حتى هوما خوتنا فالوجود والمعاناة.شوف ,غا نعطيك لعنوان ديال واحد لفقيه من لفاميلا واعر بزاف تايجيوه لكليان من مريكان,اسرائيل,لهند ,لفاتيكان...غايخرجهوم منك و يردهوم مسلمين باسمك,هاكدا غاتربح بزاف د لحسنات(ومحمدات وبراهيمات و...) ومن لفوق غايخلصوك لكرا ديال ديك لمدة فاش كانو ساكنين وتعويضات الازعاج.إوا اشنو قلتي

شاف سيمو مزيان,وخنزر فيا شي تخنزيرات فشي شكل.يمكن صحابو راه هاد لمرة تانتفلا عليه. بيني و بينكوم, والله القسم إلا ماكنت تانتفلا عليه,أنا كنت غير باغي مصلحتو صافي...ومصلحة لفاميلا,حيت دار معايا نسبة على اي كليان تانجيبوليه...للمرة الزاوجة دار سيمو بحال إلا ماكان والو, وكمل كلامو

سيمو:قلت ليك أخاي بوف, تاتحس بشي حاجة تتحرك فالداخل ديالك تتخليك تتمنى يتوقف الزمان وتقول :ماأعظم الوجود والخلق...وفالليل تتحس بالسعادة ونتا تتشوف النجوم تتغني معاك,والقمرة مضوية لمكان,و في الصباح تتشم الريح المعطر بريحة الزهر والزعتر,وتسمع الطيور تغرد وتتشوف الفراش والنحل تيشطحو فرحانين...ياه على جمال,ياه على راحة

وأنا تنسمع هاد شي,بقيت غير حال فمي,حتى دخلاتو واحد دبانة قدهة قد الصخط.وليت تانقول معا راسي:ناري سيمو تسطا,ناري ناري صاحبي لعزيز وصديق الطفولة والعمر طار ليه داك لفريخ ديال موكة الي كان عندو فداك راس الفولفو .عاق بيا سيمو وحس بالي كان تيدور فراسي وهو يقول

سيمو: بوف , وا خاي بوف, راني باقي بعقلي و ماتسطيتش...راني غير تبدلت; بدلتني الطبيعة ,وليت إنسان شاعري تايشوف الجمال في اي حاجة,وليت انسان رومانسي,وليت تنبغي التأمل والصمتسمعت كلامو هادا وقلت فراسي:لا لا ,شي حاجة ماشي نورمال,هاد لمسخوط ياإماز طار ليه لفريخ,ولا تيتريكل عليا, ولا "نيت" بالصح, ولاّ كيف ما تايقولباش نعرف الي فراسو,قررت نستافزو وإن كان هاد شي على حساب لمبادئ دياولي,وانا نقول ليه وضحكة شيطانية على وجهي!?
بوف:على ما فهمت,كان تاينزل عليك الإلهام كل ليلة حتى ولتي انسان حساس,ياك

غير كلتها,وانا ندير راسي فوضعية دفاعية,كنت تانتسنا بشي بونيا ولا شي كودبي.ولكن ماجرى والو.شاف فيا سيمو مزيا وتبسم وقال

سيمو:ولاّ عندك معا حشيان لمعاني يا ّخاي بوف!ولكن انا عارفك غير خايف عليا...اوا ماكان من اش تخاف
توقف شويا وهو يكمل كلامو وبسمة فشيشكل على وجهو

سيمو:بغيتي تعرف باش كنت تانحس من الي كان تينزل عليا لوحي,و لحوايج الي تايبانو ليا? أنا تزنكت و مابقا عندي مانقول,غلبني سيمو فلعب ديالي,جاوبتو بطريقة حشومية بزاف وعيني محدورات
بوف:علاش لا, إلا جات على خاطرك
سيمو:كنت تانحس بالشعر تيخل قلبي وكنت تانشوف الموسيقى ألوان وأشكالبوف:قولينا شي شعر من داك الشعر الي كان تايجيكسيمو: أوكي,ولكن ماتقاطعنيش حتى نكمل

أعطني الناي وغني, فالغنا سر الخلود
وأنين الناي يبقى بعد ان يفنى الوجود

هل جلست العصر مثلي بين جفنات العنب
والعناقيد تدلت كثريات الذهب
رهل فرشت العشب ليلا وتلحفت الفضاء
زاهدا فيما سيأتي,ناسيا ما قد مضى

وا غير كمل,وانا نتفرشخ بالضحك,والله ماعرفت كي درت حتى حبست الضحكة ديالي من الي كان تيقرا هاد الشعر.شافني وبدا تيتعجب, يالله بغا يهدر معايا وأنا نقول ليه

بوف: وا على سخون! وا على نقال! وا على كداب!ياك امسخوط لوالدين ,واش عرفتي بأن هاد شي الي قريتي عليا دروك من الكلاسيكيات,شحال من واحد غناه,وأشهر من غناه هو فيروز...باين الالهام الي تايجيك مايكون غير شي راديو ديال شي شيبانية مجلية فداك الجبل
بان ليا سيمو حشم وتزنك وصفار وخضار وزراق وحمار وبغال..كاع ألوان الطيف داز منهم,تقول ولاّ قوس قزح.تشجع سيمو هو يقول لي

سيمو: والله يا خاي بوف حتى تلفت,راه غير لا فاتيك وصافي, راك عارف عاد جيت من الجبل.شوف سمع هاد الشعر , والله حتى هادا ديالي,وأنا متأكد غايعجبك

كاع كاع يا زوبيدة
كاع كاع وشوفي فيا
نضرة منك لياتديني بها للسما,بلا مطية
كاع كاع فوق لكدية, نمشيو ونغنيو عنية
كاع كاع أ يور إنو
كاع كاع س واوار نم
كاع كاع و قولي ليا
راكي تبعيني صباح و عشية
كاع كاع يا نور قلبي وعنيا
لمسة منك ليا
تخليني نحس براسي سيد الدنيا

جاني الشعر مزيان ومابهش,ولكن الي ماقدرت نفهمو هو واش كملو السميات فلعالم باش يغني على زوبيدة!يالله بغيت نحل فمي هو يهدر

سيمو:إوا كي جاك الشعر ديال خوك? واعر,ياك...إوا سمع دابا لواحد لعنية كتبتها ولحنتها!!
ناري على بشر كي داير ,والله ماتايتشلخ, درنا فيه حسنة وسمعناه و بغا يندمنا,يالطيف
سيمو:إوا دير أودنيك معايا راني غانبدا
بوف:ناري! مالين الزاج غايديرو لاباس; كاع الزاج ديال الشراجم والفيترينات والتوموبيلات الي فالمدينة غايتهرس
سيمو:إوا سمعني بعدا قبل ما تحكم
بوف :تسنا, تسنا نتاصل بصاحبي الي فالبورصة باش يشري الأسهم ديال الشركات ديال الزاج
تبسم سيمو ودار عاوف تاني بحال إلا ماكان والو,و هو يبدا يغني
:سيمو
شْباخ, مّاخ ,دّاخ
كلمات سحرية من لدن حكيم عليم
لتفتح لي أبواب قلبك الوردية
علي معك احيى حياة حب أبدية
شباخ
أنا نورك, ونوري أنت
روحي ورح روحي
أحبيني الحب كله
واشتهيني الشهوة كلها
وابكي من أجلي أنهار الدنيا
ماخ

انت وجدت من أجلي
ومن دوني أنت العدم

أنت لهفانة لرؤيتي

أنت تنتظرينني, دمتي

داخ

تعالي لأمرر يدي على خدك الأيمن ثم الأيسر

تعالي لأرتشف شفتيك مثل شاي الصباح
واهمس في اذنيك احلى أنغام المساء
تعالي لأضمك إلى صدري
وأتحسس تموجات جسدك الروحاني
تعالي لأقبلك قبلة,لا بل كل القبل

شباخ, ماخ, داخ

مازال السحر لا يجدي

و مازال القمر يبكي
ولا يدري

متى سيدري? من يدري

شباخ, ماخ, داخ
كلمات سحرية عدمية
لأناس مثلي,حالمين هائمين
تواسيهم لكن لاتجدي
فمذ متئ كان السحر يجدي!

غير كمل هاد الغنا ديالو هو يتبسم وشاف فيا

سيمو:إوا باين عجبك صوت البلبل الي عندي و الكلمات سلبو ليك عقلك
بوف:ناري على صوت البلبل! أما هادوك الكلمات والله إلا داك شي عندك "بورنوعرافي" وصافي,خسرتي يامسخوط الوالدين
"سيمو:عارفك تتغار مني, كاين واحد المتل تايقول:" القافلة تسير والكلاب تنبح
بوف: انا بعدا ماتنبح, انا غير تاننهق
سيمو:خاصك تتدوق الكلمات,بحال دبا من الي قلت "جسدك الروحاني",هنا كاين التضاض ,فالجسد مادي ,وهاد العبارة تتخلي المتلقي يطرح مجموعة من الاسئلة على جدلية المادي والروحاني في الانسان و

انا ماخليتوش يكمل,لاحقاش انا حاس بهادسي غايولي محاضرة طويلة بزاف,كاد شي علاش قلت ليه

بوف:سمح خاي سيمو انا مزير
سيمو: ياك ما صريصرة عاود تاني
بوف: لا لا,هاد لمرة عير بنت عمها, انا نخليك على خير, تهلا
سيمو:تهلا, و عود بان

انا هربت, واه...جاني هاد شي كولشي فشي شكل,يإما انا تنحلم ولا نيت سيمو تبدل...ياربي تدوز هاد الحلمة بيخير... قاليك مازال "القمر يبكي"مسكين سحاب راسو قمر...يالطيف ترجر ليا صاحبي سيمو كيف ماكان...ياربي راني عيت من هاديك"خاي بوف" باش مصدع ليا
راسي



4 commentaires:

Anonyme a dit…

جعلتني أبتسم رغم الكبد............
نزار الكامن فيك يحتاج القليل من الصقل!!!!!!!!!!!!!
دام لك الالهام و دامت لك النكتة و الابتسامة.
Nana.

une marocaine a dit…

Sire Allah ye3etek chi 3e9ele !
J'ai le titre de ce billet non pas "simo jahe al ilehame" mais "séliomogia al ilhame" !!!
Eh ben :))))))))))))))

Anonyme a dit…

السلام عليكم، والسّلامة لكَ أيٌها الإمبراطور
أَضُنُّك كباقي الأشياء النّادرة والثّمِينَة الموجودة في الطبيعة والّتي تأثرت بالتّغيُّر المناخي وارتفاع درجة الحرارة . هذا هو التفسير الوحيد الذي وجدته لحالتك ٠ على العموم تدوينتك السّابقة
«Z comme Zoubida »
جعلتني أُفكّرلك في عنوان تدوينة (Z comme ZinZin )
أمّا التدوينة الحالية فهي تأكد أنّك موهوب وأن موهبتك تحتاج إلى ركل، عفوا أقصد إلى صقل.
وبما أن درجة الحرارة في إرتفاع مستمر أنصحك بارتداء قبّعة قبل الخروج من المنزل طبعا دون نسيان نظّارات تقيك من رؤية كل ما هو دسم.

دام الإمبراطور و سلم لنا عقله
ELLE

pofpof a dit…

وا على سعدي أنا...تلاتة ديال السيدات المحترمات الأنيقات الحادكات و...تيعللقو على تخربيقات ديالي...واصافي وا الموت إلا بغيتي تجي دروك ,غير جي


@ نانا

رحم الله الفقيد وأدخله فسيح جنانه...لقد كان فعلا محيطا في مجاله...البئية ف حياتك يا ست

@ مرروكية
واتي غير شدي رونديفو مع لوفتالمو و كتر بزاف من أكل خيزو

@ هي...
وا ناري على مدح عنك كي داير!...وا زوين بزاف!...ورجعتي ليا الأمل في الحياة.كنت يالله بغيت ننتاحر وأنا نقرا تعليق ديالك, وأنا نقول معا راسي: نعل الشيطان أ بوف بوف(وانا نقول:اعوذ بالله من بوف بوف الرجيم) راه عندك المعجبات ..والا مشيتي غا تخليهم بوحدهم ويندمو عليك حياتهم كاملة...ماتكون شرير أ بوف بوف وتحرمهم و اهلهم معاهم من بسمة الحياة