vendredi 5 octobre 2007

خربشة...سيمو

آه...آه لطالما وددت ان احكي لكم عن صديقي سيمو,عن مغاماراته عن حركاته وسكناته, عن رؤيته للحياه...انه فعلا "ضاهره انسانيه" لوحده, عالم غريب,فريد منذ الطفوله, ولازال...
بوف: اهلا سيمو, اش هاد لغبور?توحشناك اصاحبي
سيمو: اهلا با بوف...اوا غير معا دنيا و صافي
?بوف: اوا, كاين شي ولا غير لفرشي
سيمو: غير لفرشي....ماكاين مايدار...خوك ديما فراس الدرب , هاالي غادي ها الي جاي...ومن راس الدرب لسبير ...وهكدا ليام تدوز وحنا معها دايزين...حكا عندك شي "م س ن" ديال شي ساطه, شوف ليا معاك عفاك...باغي نمشي لمريكان ... تنحماق على فيفتي سينت.................باغي نصوفي راسي
...سها سيمو و بدا يدندن; يا لبابور يا مون امور خرجني من لميزير...فبلادي راني محكور
بوف:ه ه ه الرجوع لله
?سيمو: اوا ,واش عندك شي م- س- ن-نات ولا
?بوف : شوف فيا مزيان...واش انا وجه ل م- س- ن نات
سيمو:مالك معقد اصاحبي...موفي شي شويا و تكنكطا ليك معا راسك
بوف: انا معقد يا هادا البوقال...والله ماحشمتيش
سيمو: ايه معقد وباة معقد, ونزيدك مكبوت و قرزاز من لفوق...تتقرزز على زوج دراهم ديال سيبير...يالطيف يالطيف...ولله الا بقيتي هكدا ما عمرك دير شي حاجه
وانا نطلع فيه بشي تخنزيرات. يا الله بغيت نسمعوا شي كلام قاسح, وهي تدوز حدانا واحد الساطه مقزبه, و تتحلون فمشيتها,دايره ريحه بحال بايكو,قتلات كاع دبان الدرب,ومعكره شنايفها بالحمر حتى ولاو بحال لبومبيا
?سيمو : واو...واو...واو...قرطاسه...قنبوله...فريزه...توته...الحماق صافي...اوا كي جاتك هاد التحفه
بوف:شكون ?!! هاد لعقروشه?!!!! اودي انا ماعنديش معا القرطاس والقنابل...انا انسان مسالم...اما الفريز و التوت,البري ولا حتى البحري, تيضروني فلمعده ديالتي...انا عندي غير مع الهنديات و الدلاحات...اه تنحماق على الدلاح
سيمو: ويلي ويلي على دوق كي داير...مالك بلدي!!?...والله الا نتا قديم...تقول جاي من العصر الحجري!...وا عيق و فيق يالبريق وشوف ليك شي همزه...راك ما تادير والو
بوف:انا الي ماتندير والو يا وجه الطارو...يا هاد الماركه غير المسجله...والله ماتتقشرش;كالس تتضحك على الساطات و تتبدل فيهم وتمشي من واحده لواحده كيما تمشي لفراشه من ورده لورده ...وديما مسند ليا على حيط راس الدرب حتى عواج...ولا مسكين يدعي الله صباح و عشيه;"اللهم الف قنطار ولا ضهر سيمو ولد العطار"...وخلي عليك لكرسي ديال سيبير...رجعتيه مسكين كحل...شبعت فيه بالغازات بجميع النكهات; ها نكهة العدس...ها نكهة البيض...هانكهه الفول...ها نكهة اللوبيا,...ناري على ها نكهة اللوبيا مكنسونطريا!!!!...اما داك السروال الطايح الي لابس ليا...داير فيها زعما هيب هوبي...وباغي طلع راسك من لميزيريه, كاع ماطلعت سروالك.وباش مكملها و مجملها كالس تيضيع فوقت عباك الله بالهدره الخاويا و الشاط
اجي..., عرفتي...انا ماتانهدرش معا لبراهش...سير مسح خنونتك وارجع ليا منها واحد عشر سنين الا بغتي نكملو كلامنا
حسيت بسيمو تنرفا بزاف, تزنك وجهو.طلع ليه لغاز وحمار مزيان,ولا بحال شي بوطه ضاربا فيها شمس ديال شهر
"تمنيا,مابقا ليه والو يتفركع.لاحقاش كرجت ليه لمشعير ديالو.... من لي كان صغير كنا تنسميوه "سيمو بوخنونه
سيمو:شوف ياداك ولد ال****, ولله القسم كون ماشي لعشره لي بناتنا و صحبة السنين, لعطيط لموك بشي كوشيه ونتبعا
بشي مايكيري لديك لقنوفه السخونه...ماعارفت شكون الي كالس يضيع فوقت عباد الله ...كالس تتعاود فقصتي و تتكتب فهاد البيي الي ماعندو لاقيمه فنيه و لا ادبيه ولا حتى رساله...باش في الاخير تنشرو فديك لمزبله ديال لبوغ ديالك...و يجو لي بلوغور ويكتو ليك ;جميل جدا,رائع...جي بوكو ايمي...وخا مايكونو قراوه,و الا قراوه تلقاهم كاع ماعجبهومش, وباش تمشي من بعد لبوغات ديالهم وتقرا ليهم تخربيقات ديالهم ,ولا تدير كما ديما, كاع متتقراهم ومن بعد تكتب لهم حتى نتا جميل جدا,رائع...جي بوكو ايمي...عايشين فالوهم ياجماعة المعقدين ,يا المنافقين...الله ينعلكم من الراس حتى الراس...تفوووووووو
حسيت بالطرح سخن...قلت زعما نبردو شويا, لأني عارف سيمو علاش قاد الا تنرفا
بوف : شوف آبا سيمو
سيمو: موك هادي ماشي باك
شداتني واحد ضحكه ما عرفت كي درت حتى حبستها, سكت شويا...و درت بحال الا ماكان والو وانا نكمل كلامي
بوف:شوف اخويا سيمو...نعلن شيطان...راه غير تنمزح معاك...و زايدون هاد القصه وخا ماعندهاش شي رساله معينه, تيبقى ديما عندها هدف الي هو ,وانا نقول ليه بلفصحى واحد زوج سطور حفطهم من واحد لكتاب :"الهدف هو نقل القارئ من واقعه الى واقع افتراضي بإختراق الزمان و المكان ,متحديتا بذالك قوانين الطبيعه,وتكمن قوه القصه في مدى استطاعيتها ان تنسي القارئ واقعه ومدى دمجه في الواقع الافتراضي"مافهمت والو فما قلت , و عارفو حتى هو مافهم والو ,ولكن شويا ديال العنف الرمزي مافيه عيب ,وانا نكمل:تانيا اسي- مو, هاد لقصه عندا هدفين ,(يعني زوج بيوت) الاول ناوي نشارك بها فمسباقه و منها نتدرب شويا على الكتابه, وعلاش لا نربحها...راه فيها 50 دولار.تالتا نتقاسم مع صحابي لي بلوجر وا حد لغنيه عجباتي سميتها سيمو ميريكاني هي اصلا لي خلاتني نختلق هاد لقصه ونخلقك نتا فيها كشخصيه محوريه
سيمو:سكت ياهاد المنافق, يا الزنديق,يا المشرك ,يا الملحد ,يالكافر بالله , تتدعي الخلق...لاحول ولا قوه الا بالله ,...نتا بحالك بحالي شخصيه افتراضيه متخيله...,ايه بحالك بحالي غير متخيل , وخا تتشبه لهاداك اللي تخيلك و خرجك من راسو القرع,ما عندكش الحق تقول نتا خلتقتيني...و زايدون هو براسو مخلوق...والله الا خسرتي... تفو يا الفاسق...على مغاربه اخر زمان
بوف: سكوت راه اسمعوك الناس ويقولو هادا كاع مامربي ,ما يستاحقش يربح
...سيمو: لعنه الله عليك...باغي ترشيني...ياك...قولها باغي ترشيني, وحنا فالعشر الاواخر...اللهم اني صائم
بوف: راك غير تتدخل وتخرج فلهدره
سيمو:عرفتي, كون ماقالش سبحانه وتعالى"وجادلهم بالتي هي احسن" لاكن قلت فيك,يا هاد الكافر,كيف ما قال الحجاج اني ارى رؤوسا قد اينعت وحان وقت قطافها"
بوف:ها ها ها...صافي قلبتيها مومن...ناري على بشر تيبدل فصباغه بلا مايتقشر
"سيمو:"ربنا لا تؤاخدنا بما فعل السفهاء منا
بوف:عارفتي اش غادير...بدل ساعه باخرى و سير تلاح...ياالله تصب
شاف سيمو انه بدا يطلع ليا دم...و انني بديت نتنرفا و حاول حتى هو يبرد الطرح
سيمو:راك عزيز ابا بوف,بلا مانخسر ليك خاطرك...هاني غادي نتلاح...اديوس اميكوس
بقيت تنخنزز فيه حتى درك عليا كمارتو,بدا تيتمشى... و في الخطوه الرابعه ولا الخامسه,طاح ليه شويا السروال...دار وشاف فيا, طلع سروالو و زير صنطه ديالو و كمل طريقو , وبدا يدندن : يالبابور يا مون امور, خرجني من لاميزير, فبلادي راني محكور, عيت عيت و جوني مار
.........انا غير بان ليا هاد ديكور, هيا تشدني واحد ضحكه عالميه
سيمو انسان طيب, "الله اعمرها دار".واخا راسو شويا قاسح ولكن كيبقا هو هو,ماتيتبدلش...ديما كما هو...وكما تيقول الاشهار"الاشياء الي تتبقا كيما هي ديما ,هي الي عندها قيمه" زيت كريصطال - بتصرف
يالله بلا مانطول عليكم...نكول ليكم تهلاو
اه قبل ما تتلاحو حتى نتوما !!! ماتنساوش تزورو سيت سبيك مروكان و لبلوغ سمبلي مروكان الي منضم لمسابقه و ماتكونوش قرزازا
و جودو بتعليقاتكم و خصوصا بالنقد ديالكم


28 commentaires:

Anonyme a dit…

HAHAHA! Wakha bba (oulla mmi? :D) Simo sbbna mzyan w shbb3 fina m3yoor kaamlin f l blogoma, illa anna nnas ka ybqa waa3r. Mssab koun ma kantsh fih dik la partie dyal kaafer, mol7id llowlaniyya 7it kant déplacée shwiyya, amma ttanya 7it dkrti dik ttwishya dyal khlqt shakhsiyya, tmma watatk.

pofpof a dit…

@ lalla mira...iwa ana ferhan bzzaf a lalla 7it 3jbak nnass...
bghit na3raf ,ila jat 3la khatrek,3lach tu trouve la partie dial kafer, mol7id...chwiyya dépalcée?

Anonyme a dit…

وكما تيقول الاشهار"الاشياء الي تتبقا كيما هي ديما ,هي الي عندها قيمه" زيت كريصطال - بتصرف

كتدير الإشهار فابور ولا مخلصيناك؟

هاذاك السيمو مازال قديم في الألفاظ ديالوا

خاصوا يدوز عندي ندوز لو سطاج

و زايدون اشنو هاديك الجملة على القصة اللي قلتي لو راه ما فهمت والو، حاول علينا راه قرايتنا غي على قدنا

برافو جي ايمي هادي ضد في السيمو

pofpof a dit…

@ anima

al ichhar fabour had ssa3a...men hna l9ddam nsiniw lcontrat.

ok, rah hdart m3a ssimo , ogal liyya rah mosta3idd idouz 3ndak...bchart t3di 3lih lchi 3cha oulla chi ftour...allah ikatter men mtalek

Anonyme a dit…

J'ai dit que la première fois que tu les employés ma jawsh f ma7alhoum, jaw hors contexte, mais la deuxième fois watawk. :D

Anonyme a dit…

messali rassek :))))))))))))))))))

Anonyme a dit…

j'ai déja ecrit ya sahbi en darja,bessah h'na ya hbibi rak m'aalam,t'barek ellah aalik.makontch haseb wahed yalbes kravata yaaref yakteb chi klam kima hada.

Anonyme a dit…

Je progresse j'ai compris pas mal de mots de ce qu'a écrit Jilal dans son com :)

мσнη∂ιš a dit…

جي توكو إيمي أ صاحبي

Anonyme a dit…

والله الى ضحكتيني معاك كيما ماضحكت هاذي مدة طويلة... جات معاك الكوميديا أصاحبي غير ما قلبتي الحرفة ولليتي مهرج وللا بهلوان كاع... الصراحة الخربشات كيما كيكولو علماء النفس كتعبر على الأشياء المدفونة فاللاشعور ... ولكن معمرني كنت كنكول راك مخبي داكشي كولو...
الصراحة غادي يكون عندك مستقبل كبير فالكوميديا ...إوا آش كتسنى غير توكل على الله
في انتظار مجيئك إلى أيت ملول والسلام

Anonyme a dit…

@ lalla mira

onti zer3a choghlak? iddir lli 3ajbou!!!nari 3la fdouliyya...
chofi rah krat lfdoul taTTella3 lkolistiron o tatn9ass men lastroujin

@ unemarocaine

merci pour le passage ...tu sais n'est pas obligé de le signalé...
si tu n'as rien a dire tu peux tt simplement ne rien dire

o na9ssi chwiyya men tferniss rah tachakww bik ga3 lmwata dila ma9barat lalla zayna

Anonyme a dit…

@ Mohndis المهندس السري

bze3taaaaaaaaaaaaaaa...sdde3tina

@ annaddam
aji nta....nddemtina ga3!!!
sir fin tl3ab m3a 9ranek o khalli 3lik dderi ...oulla baghi tkhraj 3lih...ga3 matfraouh douk lmoharrijin o lkomidiyyin lli 9bal mennou....
o liyakon fi 3ilmokom a ssi "l mo7allill annafsi" rak mata3arf tsbagh...kan 3lik tsbghou b la7mar...o machi bhad lkolor

Anonyme a dit…

Ehhhhhhhhh ben dis donc tu y vas fort!!!!!!!!!!!!!!
E wa à sidi hiya lli mate3awedeche!

мσнη∂ιš a dit…

yaaaaaaaaaaaaak !!!!
merci

pofpof a dit…

@ unemarocaine ,Mohndis المهندس السري

matdirohach men ssimou 9alt swab, rah maskin hakda howwa...39lou sghir o femmou kbir

o samhou lina bezzaf......har ghntkhasem m3ah, bach ibaddel men ttasarroufat dialouuuuuuuu!!!!

мσнη∂ιš a dit…

خلعتيني أصاحبي، سحابلي نتا مول الكواريت، و نيت بصح خاصو يدوز هند أمينة يجير شي فورماسيو دالهدرة، هادي دازت ليك أولدي السيمو غير حيت عقلك صغير

Anonyme a dit…

راك غادي تربح غير قسم معاي

Anonyme a dit…

Salut pofpof,en fait je n'ai pas de carte bancaire wellah.méme pas la TV.je vis à l'ancienne.avec des poches plein de trous.ellah ghaleb.

pofpof a dit…

@Mohndis المهندس السري

ma tkhafch a sahbi...rah bdit tanformati fih...men hna chwiyya yewlli mrbbi o m2addeb

@tazat
ok ,ma ykoun ghir khatrek...je prends 50$ et je te laisse le reste...iwa ma a tnnit?

@jilal

est ce que cet absence de télé et de carte banquière ,est le fruit d'une certaine idiologie ?

мσнη∂ιš a dit…

iwa labas b3da
a sidi 3id moubarak said bach matmniti fkhatrk

Anonyme a dit…

Salut pofpof,en reponse a ta question je dirai,que ce n'est pas vraiment une ideologie,mais il maniére de vivre,comme je suis radion et pauvre,je crois que la carte bleu et la télé tout deux pousse à la consommation,alors que je n'ai pas les moyens,c'est pour me rendre malade? j'ai choisi donc de ne pas avoir ces deux,cyndrome.pour étre tranquil

Anonyme a dit…

ila teb3t blogma hna b9it o hna ntweder! 9rit bekri!

tjs un plaisir de lire de nouvelles histoires ds le cadre de la compétition.

Bonne chance à tt le monde et que le plus méritant gagne

pofpof a dit…

@ Mohndis المهندس السري

i7afdak a bba lmohandiss

@ jilal
tu as vraiment du courage...car pour le parisien que tu es ce n'est pas vraiment evident de vaire ce que tu fait

@ Maestro Amadeus

merci , bonne chance à toi aussi

мσнη∂ιš a dit…

ألف ألف ألف مبروك را ك طاير بالفرحة دابا
بغيت غانقوليك شي حاجة و حشمت:
راني مزير شويا فشي فليسات و يلا كان ممكن تسلفني أولا تخرجهوم عليا بحال زكاة الفطر را حتا أنا دايزا فيا
و احنا را خوت أولا !!؟؟؟هههههههه
:D
أسيدي بالصحة

Anonyme a dit…

@ Pofpof
Toutes mes félicitations!!!

Anonyme a dit…

c toi le big boss!
je suis tjs le dernier de la liste, mm sur la liste des gagnants :)

pofpof a dit…

Mohnds المهندس السري

با لمهندس...الله ارحم والديك ,شكرا بزاف اصاحبي.
فيما يخص زكاه الفطر...اوا راه فات لوقت ديالها هاد لعام ...حتى لعام الجاي انشاء الله....الله اعطيك الصحه...
عرفتي كون عير زدتي دوك 5 ديال لكليمات للي طالباهم سمبلي مروكان ف الاداج ديالك ديال سلوان يا سلوان...لكون ربحتي...راه اسلوبك مخير


@5estrellas

شكرا و مبروك ليك حتى نتا

Maestro Amadeus
شكرا و مبروك ليك حتى نتا و انشاء الله المره الجايه تجي الاول يابا موزار

Anonyme a dit…

3rafeti shenou? 7ena fal7ouma malli tanhaderou, makayen ghir takhessar lhadera, matalane:
Simo: finek a dak laqlawi? mouda hadi mashefnak.
Ana: Tla3 tqawad a dak zabi, fra3ti liya lkar, sir ghebar 3la dine drabi
Simo: Baraka mane had lakhera dyalek, rak mrid m3a karrak, ya 3ela 7ayawane
matata3rafesh tahedar a zabi
Ana: neta 3and din mouk shi zab ba3eda? neta fik zamela a had laqlawi
Simo: 3rafeti shenou ijik mli7? mayak 3al dine drabi daba, mafiya mayatkhara m3ak, glab 3liya a dak bnadem
Ana: Bnadem? had bnadem i7ewi lik lwalida, sir tla3 tqawad
....etc