mardi 23 octobre 2007

فرحة الفوز

غير عرفت واش ربحت فلمسباقه ديال سمبلي موروكان, و هي تشدني واحد لفرحه مامنهاش!! حتى كانت غاتقجني....ماضيعت لوقت, مشيت تنجري عند سيمو باش نتقاسمو انا وياه لفرحه...كانت الساعة التسعود من الي وصلت لدار السيمو...بديت تاندق فالباب...وهي تطل عليا مُّوت سيمو
?الحاجه: شكون
زعما راه شافتي و قشعاتني ولكن وخا داك شي تبعات لبروتوكول ديال الزيارات فالمغرب(شكون...قريب).انا قبل مانجوبها...زدت شويا د لحنانه ف الصوت ديالي ,و ربعت يدي , و حدرت راسي و قطعت ف النفس باش يتزنكو حنكاتي...درت ديك هبل تربح ديال دريوش وحشومي...لاني عارف هادشي غايطلع قيمة الاسهم ديالي ف البورصه .ديال الحاجه, وبالتالي ف البورصه ديال مِّي, لاحقاش الحاجه صاحبه عزيزه عند مِّي.
!بوف:انا
....الحاجه :كيداير اولدي?كدايرا موك? كداير باك?كدايرا ختك بوفبوفه...و خوك بيف بيف
وناري...!!! حسيت بالحاجه غاتسولني كما العاده على قبلتي كلها...الي حي فيهم و الي ميت...وانا نقول معا راسي الا ماوقفتهاش دروك ,هنا غانبات...ياخساراه على المستتمرين المساكين الي راهنو على الاسهم ديالي فبورصه مي و الحاجه...وانا نزرب عليها
بوف:الحاجه...كاين سيمو...عفاك الاكان كلميه ليا...وقولي ليه بوف بغاك ضروري
ناري الحاجه ماعجبهاش نقاطعتها...حسيت بالعافيه غاتخرج من عينها...والله القسم كون ماكنت عارفها فيها التنسيو و ماتاتاكلش المالح , لكون فطرات بيا...بلا ماتدبحني على الطريقه الاسلاميه ولا حتى بلا ماتطيبني
??الحاجه: اشنو??...اش قلتي
عارفها تتبوحط عليا...وباغيا تنتاقم مني وتسوسني...ولاكن معا من !!?....وانا نبدا نغوت حتي ولا كل ما ف الدوار يسمعني
بوف: مالكي الحاجه ??...ياك مامريضا?...ياك ماولتي صمكا...اوا الله يشافي, ولله الا بقيتي فيا,راه نتيا بحال مي...شوفي ياالحاجاه ,راه تانعرف واحد الطبيب واعر.
حشمات الحاجه, و هي تبدل ف الاسلوب
الحاجه: غير بشويا ياولدي راني تانسمعك...اش بغيتي?سيمو? هاني نمشي نفيقو دروك ياوليدي
ناري... بدلات الحاجه فالاسلوب ف زوج تواني, سبحان مبدل الاحوال.
تلات دقايق من بعد خرج ليا سيمو كاع مغوبش, عينيه عامرات بالعمش الصفر,تقول هادا المنتج العالمي الاول للعمش من النوع الجيد ...فمو عاطي ريحه, تقول شي زيكو مبوشي وميتين فيه شي خمسين حمار...ولابس ليا فوقيا بيضه تقول هادا مدوز اليل فشي حضره ف شي زاويه...ولكن انا عارفو كي تايدوز اليل وعارف الحضرات ديالو كيدايرات
??سيمو: صبحنا على الله ...اش كاين بالسلامه
بوف: عندي ليك واحد لخبر واعررررر
??سيمو: اش? ربحت اللوتو
بوف:لا
??سيمو: شي ساطه وكلا عليا الجوانط و البناوات و البيدالات
بوف: لا
??سيمو: حيدو تنضيم كاس لعالم لجنوب افريقيا و عطاوه للمغرب
بوف:لا
??سيمو:جورج بوش شدوه البَّاسر
بوف :لا....واش عقلتي على المسابقه فاش شاركت...راه ربحت فيها...راه جيت انا الاول و ديت 50 دولار مريكاني
سيمو: اشنو ?...شاركتي!ربحتي! جيتي الاول! ديتي 50 دولار!...فين هيا نون الجماعه ياهاد الغمَََّاق, ياهاد الفكرون...والله الا ماتاتحشم...راه شركنا و ربحانا وجينا و دينا...واش فهمتي ياهاد راس الطارو
شفتو بدا تيتنرفا عليا كما العاده...و كما العاده الا تنرفا سيمو,تنبرد الطرح
بوف:شوف ابا سيمو
سيمو: قلت ليك مليون مرة, موك هادي ماشي باك
ناري...ديما تنسا بأن سيمو ماتيحملش شي حد يقول ليه با, وكل مره تنقولها ليه, تايجاوبني داك لجاواب. تيقتلني بالضحك...
بوف: ياسيمو,راه انا الي كتبت النص! وانا الي شاركت بيه وضيعت من وقتي....يكفيك فخرا انك شخصيه محوريه
سيمو:والله الا ماقسمتي معايا حتى نخسر معاك ,و نرفع عليك دعوه نتهمك فيها بالقذف العلني والسرقه الفكريه, لانك عيبتني وصورتيني ف صوره خايبه و لانك عاودتي قصه ديالي بلا ماتعوضني
بوف :اش دخل حمارتكم لأسبوع الفرس??!!,...الله ارحم والين مُّوك, الا ماكنتي تاتفهم فشي حاجه بلا ماتقربها ...انا باغي غير نفهم مال داك الراس عنك قاسح...وقيلا عامر بالكرانيت و البازالت...اما كون كان عند غير زوج غرام ديال لماده الرماديه,لكون عرفتي انك ما غاتدي معايا والو..ناضا ...نوتنغ...اميا...غيان...لأن القصه حتى هيا قصتي, و داك شي الي تنعاود, كولو واقع و ماتانزيد والو من راسي
شاف السيمو بأن داك شي لي تنقول معقول, وانه ما غايدي معايا والو...و هو يبدل فالإستراتجيه
سيمو: شوف اخويا بوف...فين هما دوك لمبادئ ديالك ديال الاخوه و الصداقه و التضامن...وادين بدين الحب...ولا كل
??شي داك شي غير كدوب
...اوا...مابقى عند مانقول...قضا عليا سيمو.
بوف: مايكون غير خاطرك يا سيمو...فيفتي فيفتي....اوا عرفتي اش غانديرو دبا...دير اديك باش ندعو معا سمبلي مروكان...بدا سيمو تيدعي وانا تنقول امين,...والله الا جات معاه شي شيخ ديال شي زاويا...عندو اللوك ديالهم وحتى لجيست ديالهم...ماتقول هادا هيب هوبي...دوك لجيست كاينين فالاشعور...وبدا تيدعي بالفصحه
سيمو: اللهم اكثر من امثالها ,لينضمن المسابقات و يفوز بها امثالنا
بوف :امين
سيمو:اللهم ان كانت محسنتا فزد من حسناتها وان كانت مسيئتا فاغفر لها
بوف: امين
سيمو:اللهم ارزقها الزوج الصالح و الذريه الصالحه ,و النوويه حتى هي, ولا تسلط عليها البرادعي و الولايات المتحده,....اللهم اسقي بلدك الميت وارحم عبادك و بهيمتك...اللهم باسمك صمت وعلى رزقك افطرت ذهب الظمأ وابتلت العروق وثبت الاجر ان شاء الله....الهم اني اعوذ بك من الخبث والخبائث....اللهم ان هذا لمنكر...اللهم انصر امير المؤمنين حامي الملة والدين...اللهم اني بلغت فاشهد....اللهم العمش ولا العمى...
ناري على سيمو, والله الا ماتايتقشرش...فين ماعارف شي حاجه فيها اللهم الا و قالها... وكيما قالو الغيوان السلامه ...السلامه ...السلامه يامولانا..هاد سيمو ولا مهبول بانت فيه العلامه" بتصرف"
بوف: ه ه ه ...الرجوع للله
عاق سيمو براسو وهو يختم الدعاء,يا الله بغيت نمشي,هي تطل موت سيمو...بغات تصلح الخطأ ديال ديك الساعه
الحاجه:مازال هنا ياوليدي...طلع تشرب شي كاس داتاي
ناري...على اتاي عندها...نشرب سم و مانشربو...اتاي عندها توكسيك لدرجه انها من الي تتخوي داك شي الي بقا ليها منو على الحباق...الحباق تيموت...ماعرافت كي تايدير سيمو حتى مايطرا ليه والو...واقيلا عندو معده ماد ان جرماني...ماش بحال ديالتي ماد ان تايوان
بوف: يرحم والديك يا الحاجه, مرة اخرى...الا كتب الله
الحاجه:اوا ما تحشمش ياوليدي...راه الدار داركم
بوف: راه عارف يا الحاجه...و الله الا مزروب
الحاجه: ماتخسرش ليا خاطري ياوليدي
واك واك ياعباد الله كيفاش نتفك من هاد لمصيبه...ياربي اش هاد لبليا....ولكن لقيتها
بوف: راه بيا صريصره ....و راني مزير...غانمشي لدار...الله يعاونكم
مشيت تانجري والحاجه وسيمو تيضحكو....اللهم يضحكو عليا ,ولا داك سم ديال اتاي
وقيلا طولت عليكم...اوا سمحوليا بزاف....دابا نخليكم حتى لمره اخرى...من هنا لداك لوقت نقول ليكم تهلاو ف ريوسكم
بالمشطه و شامبان)...و نتقاشعو انشاء الله)

19 commentaires:

мσнη∂ιš a dit…

خطييييييييييييييييييييييير أ صديقي نتا و داك السيمو ديالك، خاصك مازال تزيد تهضر لينا على ديك مو، لمرا مسكينا باغا دير معاك غا الواجب و نتا فرطتيها حقا ما حقا فيا صريصرة هههههههههههههههههه، وا ما شكيتي أولدي. على محال مبروك أسيدي للمرة الثانية و لا ماعرت الثالثة را مابقيتش عاقل حيت دوخني واحد يوكو عاد شربتو دابا



آش درتيلي فالقضية دالسلف

pofpof a dit…

@Mohndis المهندس السري

الله يحفظك ا با المهندس....اوا الخطر هو الضو....اوا نشاء الله نعاود ليكم على مو...وراجلها...ناري كدايرين...ما تتصورش اصاحبي
السلف كاين و بتسهيلات في الاداء...خاصك غير تتوفر فيك الشروط الضروريه و تصيفت الوثائق اللازمه الى العنوان المحدد ,وذلك قبل نهايه المدة القانونيه

мσнη∂ιš a dit…

إوا إلا تسنيت حتى يتجمعو الوراق تما بقيت، راني معول نلخد واحد الكولفا حولية،باقا نقيقية، غا شوف كي دير الله يحفضك ؤ كان

pofpof a dit…

@Mohndis المهندس السري

ok...iwa ila bghiti ddossi dialek yemchi bzzaeba...khassek ta3tti chi 9hiwa

мσнη∂ιš a dit…

أييه علاش لا، اللهم فيك بعدا، نتا مول الفلوس وتكون على حسابك و الله ما نردها ليك فوجهك

pofpof a dit…

ok...iwa kifach ghandirou daba?!!!

мσнη∂ιš a dit…

blach qhiwa, kass d rayb w 30 ryal d l7rcha baraka alik (wbla matm3 fiya rani drwich wma3ndich)

Anonyme a dit…

سيدي يا سيدي على الناس اللي ربحوا في المسابقة

شفتي آ ولدي آ بوف بوف كون شاركت أنا ما كنتيش غادي تدي الريال و لكن حفظك الله انت و هاذاك المسخوط ديال السيمو هههههههههه

باين أتاي ماماه مأثر فيه و هو اللي مخليه حمق

يحسن عوانه مسكين

المهم من هاذ العضرة كاملة مبروك و راك تستاهل

pofpof a dit…

@ mohandis,

iwa maykoun ghir khatrek

@ anima

rah 3arfek w3ra...merra jjayya noubtek incha allah...
ah...mamat ssimou tatssellem 3lik o tat3rad 3lik tcherbi wahad lkwiyyis dial atay ;)

мσнη∂ιš a dit…

صباح الكفتة مخضرة ب الفجل

pofpof a dit…

@ mohandiss

rjou3 lillah rah sbah jem3a!!!

Anonyme a dit…

la sma7 lia tbib mana3 3lia atay

charbo nta

Majhoula a dit…
Ce commentaire a été supprimé par l'auteur.
Anonyme a dit…

@ anima

iwa may koun ghir khatrek,ila mabghiti atay dialha...hiyya tdou9i l7alwa dialha, oulla chi 3cha ;)

@ simplymoroccan

al3afw,...o rah wesselt slamek l ssimou...raki merrouda ntiyya o anima l chi 3cha...men tabkh mamat ssim!oui ssimou

Anonyme a dit…

Salut 2xPOF,
Un bon essai, j'ai trouvé du plaisir à le lire ...

Chafik

Anonyme a dit…

Voilà j’ai fait ma pose rire du dimanche ! mieux que les débiles sketch de la télévisio marocaine ! Décidément t’as un don pofpof , t’es doué !

Mabrok pour la victoire et ambarsses moi simou (et lhadja si possible )

Anonyme a dit…

@ chafik

merci Dr chafik...plaisir partagé ;)

@larbi

merci...je suis vraiment flatté...
ah, pour le bisou c'est fait...sache que tu es invité par l7aja pour un thé...

Fhamator a dit…

ce qu'a dit larbi est exactement ce que j'allais écrire. Envoie ton CV à la RTM Pofpof, je serais certainement plus heureux pendant le Ramadan...

Merci pour la rigolade...

Fhamator

pofpof a dit…

@ fhamator

merci fhamator…je suis vraiment flatté

plus heureux ,ou moins frustré ???? ;)))))))

ah….j’adore qu’on m’admire….j’adore…que les gens disent du bien de moi…ah, j’adore toutes ces bonnes choses….j’adore moi-même….je suis vraiment magnifique et extraordinaire :)