"انا و" نفسي

واحد السلام عليكم

"سمحوليا يا سيادي نعاود ليكم لقصة ديالي معا "نفسي

باش غانبدا??...باش غانبدا??...بالطبع باش ما عطا الله

من نهار عقلت على راسي, وانا و" نفسي" ديما مجموعين,سبحان الله بحال التوام. فين ما مشيت تتمشي معايا و اي حاجة درتها تاتدير بحالي...قرينا فنفس المدراسات, و مشينا لنفس البلايص, وعندنا نفس الصحاب,ولعبنا نفس الالعاب, وتفرجنا فنفس الرسوم و الافلام...بخلاصة ,انا ويها عشنا نفس المعاش وبالتالي عندنا نفس التجربة و نفس الذاكرة , وتقريبا نفس الوعي

وسبحان الله انا وياها تنتشابهو , لدرجة ان اي واحد تايشوفنا تايقول اننا مستمسخين, عفوا بغيت نقول مستنسخين...عندها لعينين وعرات وعامرات بالنور الي تيدل على وجود البركة والعلم اللدني (سبحان الله بحال ديالي),ضحكة ديالها زوينا تتفرح القلب (سبحان الله بحال ديالي) شعرها رطب(سبحان الله بحال ديالي) نيف عندها مابيهش(سبحان الله بحال ديالي)...الحصول يا سيادي و بلا مانخبي عليكم هاد الصحبة و هاد التشابهات هما الي خلاوني ناكل الجوانط...إيه, انا تانحماق عليها و تانموت عليها...يمكن ليكم كاع تقولو اني كليت عليها حديقة الحيوانات...بل غابة الامازون براسها...ولكن ماشي هاد الشي بوحدو الي خلاني تانموت عليها...اودي, عندها واحد الشخصية فريدة, ماكاينش منها زوج فهاد العالم...ديما باسمة ,ديما دايرا لومبيانس, وفكريا متفتحة بزاف على كل التوجهات والتيارات( بيما فيها التيار الكهربائي والهوائي والكولف ستريم), وحاسا براسها ;فيها شويا ديال جنون البقر...عفوا جنون العضمة ,وشي مرات بزاف ديال جنون العضمة.ولكن الله اعمر ليها الدار ( باش ?? الله اعلم!) مزيانا معا الناس كاملين من اقصى اليمين إلى اقصى الشمال (سبحان الله بحالي),وداخلا سوق راسها (وخا ماعندهاش سوق) بعد هاد

شي كلشي غاتقولو ليا
?!!!فينا هو المشكل -

!!?وعلاش مصدع لينا ريوسنا بكترة الصباغة و الكدوب واش حنا ماعندنا مايدار -
وانا غانجاوبكم بكل لطف وادب ورقة( الحال بدا تايسخن ,اوا حلو شراجم الا مابغيتوش تخنقو)وبسمة من الفوق

ـ بيكنباور...بيكنباور...اوا صبرو, فين زربانين بالسلامة?!! راه الي زرب تعطل ,و كيما تيقول المتل; في التأني السلامة و في العجلة

!!!الندامة ... و ماتسولونيش واش في العجلة القدامية ولا الخرانية,والله ماعرفت

اودي, يا سيادي هاد لقصة بدات, بحالها بحال جميع القصص, بعقدة...ايه بعقدة ,ماشي ديالت الحبل...ولا ديالت دا فرويد

واحد النهار ,فقت انا و" نفسي" من النعاس( ايه, تانعس انا ويها فنفس السداريا...لكن ماتانديرو والو...داك شي في حدود الشرع...ولا سحابكم انا مامربيش ولا??!!...واهلي عليكم نتوما!!... تاتنواو بزاف...راه: إن بعض الضن اثم) قلت ليكم , غير فقت وانا نمشي نغسل وجهي ف لافابو,شويا وانا نسمع شي حد تايقمقم...طلعت عيني وهيا تبان ليا "نفسي" فلمرايا
انا :اش تاديري هنا...وعلاش هاد الصداع

نفسي :صبحنا على الله...نتا عاوت تاني

?انا : مالكي... واش كولشي بخير

!!?نفسي :مامالي والو!!...واش الي تايصبح على هاد الكمَّارا غايكون بخير
انا : شوفي والله مافيا الي يمزح معاك...راني مدك دك ومانعست مزيان...خلي لمزاح حتى العشية ونقصرو عاود تاني كما العادة
"نفسي :انا راه ما تانمزح معاك ياهاد "طويل العجلات و قصير البيدالات
انا : اووووووف...غير قولي ليا مالك...اناعارفك مدرونجياك شي حاجة
نفسي :قنط منك...مابقيت حاملاك...بغيت نبدل...بغيت نعيش تجارب جداد...بغيت نتعرف على ناس جداد, نحبهم ويحبوني...انا مليتك...انا كرهتك...مابغيتش باقي نبقى معاك
غير كملات هاد لكلام و هيا تبدا تدمع...انا غاضني كلامها و مارديتش لبال لدموعها ,داك شي علاش جاوبتها بعصبية
انا: مادوخيش عليا... انا عارف شي حاجة تدور ليك فديك الصنطيحة ديالك...انا عارفك باغيا تتصاحبي...باغيا تعيشي قصة حب...صافي, هاكدا خويتي بيا

هيا تجاوبني بصوت عالي
نفسي : وعلاش لا, هادي حياتي ندير بيها مابغيت...وزايدون نتا ماتتجيب ليا غير المشاكيل والملل...كرهتك...كرهتك...كهرتك ,تفووو .على الحياة معاك

صدمني كلامها...صدمني بزاف...حسيت بحال الا دخل فيا شي تران.ماتوقعت هاد الشي منها.خانتني...خانتني...اح, قلبي ضرني,قلبي تايتحرق; شاعلا فيه العافيا( واك واك ياعباد الله...عيطو على البومبيا), راسي غايتفرقع
بقيت غير تانشو فيها...مابقيت عارف اش نقول
انا : ا ...ا...ماحشمتيش...مابقيت فيك انا نبقى وحداني...صافي هكدا نسيتي سنين العشرة والطعام والملحة الي شركنا...نسيتي لحضات الفرح والحزن الي تقاسمنا(بالموس وبعض المرات بالمقص)...نسيتي اللدة الي تانحسو بيها إلا سمعنا لشي موسيقا زوينا, ولا الا قرينا شي مقال ولا الا تفرجنا ف شي فيلم...نسيتي الطمأنينة الي تانحسو بيها الا عارفنا بأن اهلنا و صحابنا كلهم بيخير...نسيتي يا الغدارة...نسيتي بأني ماعمري ماخسرت ليك خاطرك, اي حاجة قلتيها ليا الا درتها; واش عقلتي نهار طاحو عينيك على داك البورتابل الغالي.وقلتي ليا ولابدا نشريه ليك, وانا نحيد لفلوس لراسي وشريتو ليك

عقلتي على نهار جا عندي صاحبي وديع وطلب مني نسلفو سي دي ديال ناس لغيوان, ونتي تقولي ليا نقول ليه ماعنديش لاحقاش كنتي محتاجاه

!?ونهار قولتي ليا نسرق درهم من بزطام مي

ونهار قلتي ليا نضرب كلب الجران بالحجر...ونصبغو بالحمر و الخضر...ونحفضو النشيد الوطني بالعصا و الزرواطا

!?ونهار قلتي ليا نبول على الحباق ديال جدا

و نهار قلتي ليا قول للناس باني من اكادير وماشي من ايت ملول ,باش مانحشمكش ,لأنها مامعروفاش وما زويناش بحال اكادير

ودوك ليام لي تتقولي ليا فيهم بلا مانفيق نمشي لكور ديالي, كنتي تاتزاوكي فيا نبقا ناعس حداك,لاحقاش كان لبروف

تيبان ليك ممل والنعاس حدايا تايجيك حلو
...وزيد وزيد حتى لسيدي بوزيد

ضحيت بفلوسي,بكرامتي(ماشي ديك الي تتباع عند مول الحوت...ديك الاخرى) ,بالسمعة ديالي بالمستقبل ديالي, باش ف الاخير تقولي ليا كرهتيني و تديري ليا صابونة
زعما سحابك إلا مشيتي وخليتيني, غانبقا بلا نفس...راكي غالطا...عطا الله السطاسيونات,و فابور من لفوق

والله الا صدقو هادوك الي قالو "النفس امارة بالسوء"...يهاد المشرارة

غير قلت هاد شي وهيا تسيل من عيني دمعة...تبعاتها تانيا...تالتا...ايه...بكيت...وعلاش انا ماشي بنادم...مانبيكش!!!و...فكرت

وخممت...وعاوت فكرت,وانا نقول ليها
انا : شوفي...انت حرة...ديري ماعجبك...وسيري فينما داوك رجليك...وديري اي حاجة تتمنيها...سيري عيشي حياتك ونسايني, اما انا محال ننساك
ماعجبهاش كلامي وحسيت بيها تقلقات شي شويا...دورات وجهها و بغات تمشي ...ولكن مقدراتش...طلعات فيا عينيها وبدات تاتشوف فيا...فهمتها اش بغات تقول

!??انا:خايفة?...بوحدك ماتقدريش ?بغيتي نمشي معاك ونعاونك,كما ديما...ياك
!!رمشات وماقالت والو
دارت اختيار...ماعندي غير نحتارمو ,طلما غاتحمل النتائج ديالو والعواقب ديالو

تفووووو... والله الا باقيا عزيزة عليا و وباقي تانبغي هاد الزمرة المغرورة و المتكبرة...

لبست حوايجي واحنا نخرجو انا وياها...مشينا نقلبو ليها على تجربة وقصة جديدة...داز النهار الاول بلا نتيجة...التاني حتى هو...التالت....الالف,وديما والو...والعلاقة بيني و بينها تتزاد تْكْفّس...
اوا اسيادي ,اش غانقول ليكم...والله الا بقات فيا...ديما فالليل, قبل ماتنام, تتصدعني ببكاهها ...ولاَّت لياليها بلا نهاية, ولاحد يونسها...انا ماكرهتش نونسها ولكن مابغاتش. ماتايدوز نهار الا مابكات فيه .والله الا ماتاتستاحقش هاد العداب والله الا هي طيبة ( طيبة بزاف... حتى تكرملات)...والي محيرني هو انه عندها, تقريبا, كل المؤهلات(الجغرافية, المناخية والحضارية...) باش تنجح قصة و تجربة جديدة...ولكن يمكن مامكتاباش ليها ,ولا يمكن شي حاجة ولا شي شروط مخبيهم عليا و مبغاتش تقولهم لي

الليام تادوز و الحالة هيا هيا...وعدابها تيتزاد بطريقة أسية

إوا اسيادي, كانت هادي هي قصتي مع "نفسي" ومزال...نتمنا نكون ماطولت عليكم ...والي عندو شي نصيحة يجود بيها علينا...والله يجعلكم ديما فرحانين

(وكما العادة نقول ليكم...ياللهو...تلاحو, وتهالاو فريوسكم( بالمشطة و شامبان و مرة مرة ديرو ليه جيل